Sjálvboðin skulu hjálpa í eldrarøktini

Á ellisheiminum í Gøtu, skulu sjálvboðin nú hjálpa við ymsum praktiskum uppgávum. Eitt nú við at gera klárt, sita saman við búfólkunum og ganga túrar. Høvuðsorsøkin er starvsfólkatrot, sum er ein vaksandi avbjóðing í eldrarøktini, sigur leiðarin í Nánd, sum skipar fyri royndarverkætlanini. 

- Ætlanin er ikki, at sjálvboðin skulu taka sær av røktaruppgávum, sigur Poula Reinert-Petersen, leiðari í Nánd, um verkætlanina, ið byrjar fyrsta dagin. 

Hon ásannar, at ein avbjóðing við einari slíkari skipan, er, at bland kemur millum uppgávur hjá sjálvbodnum og starvsfólkum. Um tað skuldi hent seg, so má royndarskipanin tillagast, leggur hon aftrat. 

Sjálvboðin kunnu vera ein góð hjálp, eins og tey sjálvi kunnu fáa nakað burturúr at hjálpa til á ellisheiminum, heldur Poula Reinert-Petersen. 

Spurd, hví fleiri starvsfólk ikki vera sett, svarar hon, at starvsfólk snøgt sagt ikki eru tøk. 

- Um fleiri skulu arbeiða á eldraøkinum, so fara tey at mangla aðrastaðni. Vit mugu tí taka eitt kjak um, hvussu okkara vælferðarsamfelag skal síggja út frameftir,  sigur leiðarin Nánd. 

Mary Antonsdóttir, sum er forkvinna í Heilsuhjálparafelag Føroya, var gestur í sjónvarpsstovuni.