Jens-Frederik Nielsen eftir toppfundin: "Samskifti er sera umráðandi"

Jens-Frederik Nielsen, grønlendskur landsstýrisformaður, var væl nøgdur við trygdarpolitiska toppfundin millum stjórnarleiðararnar í útnorði. 

"Vit hava sett hol á eitt tættari samstarv um trygdarpolitikkin, og tað er sera umráðandi, soleiðis sum heimurin sær út í dag."

Sambært nýggja grønlendska landsstýrisformanninum, so er samskifti serliga umráðandi í ríkisfelagsskapinum, har tað er Danmark, ið umsitur uttanríkis- og trygdarpolitiska økið.

"Samskifti er lykilin. Vit hava verið eitt lágspenningsøki trygdarpolitiskt inntil nú, og vit høvdu gjarna viljað hildið fram soleiðis, men tað er bláoygt, sum politiska støðan í heiminum sær út. Tí mugu vit í útnorði samstarva tættari og samskifta oftari á trygdarpolitiska økinum," staðfesti Jens-Frederik Nielsen.