Politikkur fluttur á sosialar miðlar

Politikkur flytur seg meira og meira á sosialar miðlar. Politikarar siga sínar hugsanir í tíðindaskrivum og á sosialum miðlum, men tá fjølmiðlarnir seta seg í samband við tey, hava tey onga viðmerking til tað, tey hava skrivað. Tað sigur blaðstjórin í Sosialinum, Eirikur Lindenskov. Hann skilir ikki, hví tey ikki vilja gera viðmerkingar til tað, tey hava sagt, tí tá tykist tað, sum tey ikki standa við tað. 

Uppgávan hjá fjølmiðlunum er at upplýsa borgarar um samfelagsviðurskifti og at halda vakið eyga við valdinum, sigur Eyðbjørt Skylv Midjord, miðlafrøðingur. Á sosialum miðlum kann ein einstakur politikari lýsa eitt evni við sínum egnu vinklum og fortreytum. Tá eiga fjølmiðlarnir at koma við kritisku spurningunum, men tað ber ikki til, um fjølmiðlarnar ikki fáa fatur á politikarunum. Tað er ein trupulleiki fyri fólkaræðið, sigur Eyðbjørt Skylv Midjord. Tað er fólkaræðisligur trupulleiki, at borgarin ikki fær alla søguna við, og fjølmiðlarnir fáa ikki røktað sína skyldu til fulnar.