Adam Marušic: Trý týðandi stig fyri okkum

Dysturin ímóti Føroyum var torførur, segði bakkurin Adam Marušić, sum spælir við italska felagnum Lazio.

Montenegro hevði fyrireika seg upp á at spæla ímóti 5-4-1 skipanini hjá Føroyum, men tað gekk striltið at skapa kjansir, og leingi sá út til, at liðini fóru at fáa eitt stig í part.

 - Eg trúði upp á tað heilt til endans, og so hendi tað, sum hendi. Vit skoraðu í síðsta minutti, segði Adam Marušić.

Sigurin var sera týdningarmikil fyri okkum, og vit mugu halda fram á sama hátt, segði Lazio-bakkurin, sum gleðir seg at koma til Føroya til returdystin.

 - Tað verður eisini ein trupul dystur, og vit fáa at síggja, hvussu hann spælir av.