Andrias Edmundsson: - Vit blaka alt í skrellispannina

- Eg trúgvi tí næstan ikki, segði Andrias Edmundsson.

Tað var kortini beiskur veruleiki. Montenegro hevði skorað við seinasta sparkinum í dystinum, og stjól stigið, sum føroyingar mestsum høvdu sett á bók.

 - Vit gera nógv ordiliga gott, og so blaka vit alt í skrellispannina í síðstu sekundunum. Kenslan er ræðulig, staðfesti hávaksni miðverjin eftir dystin.

Tað var málleyst á Niksic City Stadion, og teir seks minuttirnir, sum dómarin hevði lagt afturat, vóru nærum uppi, tá heimaliðið fekk lyft ein høgan bólt inn í føroyska brotsteigin. Ein nærdyst og eini tvær skotroyndir seinni fall bólturin fyri føturnar á Edvin Kuc, sum sendi hann í netið umvegis eitt føroyskt verjubein.

Tí eitur úrtøkan einki føroyskt stig eftir tveir teprar ósigrar ímóti Kekkia og Montenegro.

 - Tað er forferdiligt, men fyri meg gevur tað eisini optimismu. Tí hesir jubla, sum teir hava vunnið Champions League-finaluna, og eg gleði meg longu til næstu samling. Nær er tað, vit møta teimum aftur, spurdi Andrias Edmundsson, sum gleðir seg til heimadystin ímóti tjóðini á Balkan.