Eldsálin 2024: Súsanna Maria fjálgar um B36-familjuna

Øll í B36 kenna Súsannu Mariu Hansen og døtur hennara, og tað er ikki so løgið.

 - Mínar gentur eru mestsum føddar inn í B36-húsið. Tóra, tann yngra, varð fødd í januar, og eg byrjaði sum venjari í februar og hevði hana í fetli, meðan eg rann úti á vøllinum og vandi Jonnu, ta eldru, sigur Súsanna Maria Hansen.

Hon er í dag varaforkvinna í B36, men nólsoyingurin hevur brúkt stóran part av lívinum í Gundadali sum spælari og venjari hjá teimum hvítu og svørtu.

 - B36 er ein góður felagskapur at vera í, og eg føli, at eg kann gera mun, staðfestir hon. 

Fjálgar um B36-familjuna

Súsanna Maria Hansen gongur upp í felagsskapin við lív og sál, og ger alt fyri at fólk trívast í felagnum. Bæði tey, sum hava sína dagligu gongd í B36-húsinum, men eisini tey, sum vitja til kappingar í annað.

 - Eg ivist ikki í, at allir felagsskapir í Føroyum vildu ynskt at havt hana sum partur av sínum felagsskapi, sigur B36-forkvinnan, Marita Debess Magnussen.

 - Hon er eitt menniskja, sum altíð er í ja-hattinum. Sera smílandi og fyrikomandi. Tá hon er í húsinum, fær hon øll at tíma at gera meir.

Kvinnufótbóltur er hjartabarnið

Eingin ivi er kortini um, at fótbólturin við gentum og kvinnum er hjartabarnið hjá fyrrverandi verjuspælaranum, sum spældi meir enn 200 dystir fyri besta liðið.

 - Hon dugdi væl at takkla, og so var hon altíð soleiðis: "Kom nú gentur!", flennir fyrrverandi liðfelagin og vinkonan Elsa Anna Kjartansdóttir Mohr.

 - Hon er eitt sindur eldri enn eg, so hon hevur altíð verið ein sovorðin mamma fyri meg, sigur Elsa Anna Kjartansdóttir Mohr.

Tá Súsanna Maria Hansen fór upp í nevndina, var tað millum annað við tí fyri eyga, at bøta um umstøðurnar hjá kvinnum og gentum í felagnum.

 - Tá helt hon, at nú hava vit tosað so nógv um kvinnufótbólt. "Eg føli, at eg havi ikki nóg nógva ávirkan. Eg fari bara í nevndina. Har havi eg ávirkan". Og har hevur hon siti í fýra ár og hevur virkuliga verið tann persónurin, sum hevur fingið nevndina at lurta og flutt okkara kvinnufótbólt til tað stigið, sum hann er á í dag, sigur Marita Debess Magnussen.

Súsanna Maria Hansen er í uppskoti til heiðurin Ítróttaeldsálina 2024, sum Ítróttasamband Føroya letur á árliga Ítróttafagnaðinum 1. februar.