Jóannes Bjartalíð: Blandaðar kenslur eftir mál og javnleik

Jóannes Bjartalíð hevði blandaðar kenslur eftir javnleikin ímóti Armenia hóskvøldið.

Tað góða var, at klaksvíkingurin kom aftur á vøllin fyri Føroyar og skeyt eitt mál, sum kendist sum - og kanska átti at verið - sigursmálið á Tórsvølli. 

Tað keðiliga var, at miðvallarin beint eftir mál sítt misnýtti stóran kjans og í yvirtíðini mátti síggja armenar javna og samstundis køva sigursrómin, sum bæði venjarar, spælarar og viðhaldsfólk hava saknað og hava tørv á.

 - Tað er ein blanding av øllum. At vit ikki taka tey trý stigini í dag, tá vit fáa 2-1 málið, og eg havi tað, sum tú kanst kalla ein hundrað prosent kjans at skora til 3-1, og so fáa teir eitt skræpumál í yvirtíðini, sum aldri skal blíva til mál, segði Jóannes Bjartalíð.

Fóru framum tvær ferðir

Jann Benjaminsen legði Føroyar framum, tá 37 minuttir vóru spældir við góðum skoti, tá ein bóltur varð skallaður útfrá eftir deyðbólt, men beint fyri steðgin javnaði Armenia, tá Lucas Zelarayan skoraði við beinleiðis frísparki av brotsteigarmarkinum. 

Bæði liðini skaptu kjansir eftir steðgin, men tað var Jóannes Bjartalíð, sum tók sakina í egnar hendur fimm minuttir fyri leiklok. Fredrikstad-miðvallarin setti bóltin lágt inn við nærru stongini eftir frálíkt einmansavrik. Hann fegnaðist eisini um aftur at kunna umboða landsliðið.

 - Heilt einastandandi at vera aftur í føroyska búnanum og sleppa at spæla fyri føroyska landsliðið. Heilt fantastisk kensla, sjálvt um eg nokk ikki eri í bestu útgávu av mær sjálvum, og tað er ekstremt tungt at spæla í løtuni, segði Jóannes Bjartalíð.

Sunnudagin spæla Føroyar týðandi heimadyst ímóti Lettlandi á Tórsvølli.