Fimm fakfeløg aftrat gjørt semju við Fíggjarmálaráðið um lønarkarm

Fimm fakfeløg aftrat hava gjørt semju við Fíggjarmálaráðið um ein lønarkarm upp á 3,87 prosent næsta árið.

Tey koma aftrat teimum 12 fakfeløgunum, sum frammanundan hava gjørt semju um lønarkarmin. 

Flestu av hinum fakfeløgunum eru eisini farin til samráðingar um sáttmála, upplýsir Jan Sjóstein, stjóri á lønardeildini í Fíggjarmálaráðnum.

Lønarkarmurin er 3,87 prosent. Í flestu førum verður øll hækkingin løgd oman á lønina, og í øðrum førum verður partur av karminum brúktur til umflokkingar.

Tey 12 feløgini eru Starvsfelagið, Heilsurøktarafelagið, Ljósmøðrafelag Føroya, Búskapar- og Løgfrøðingafelag Føroya, Yrkisfelagið Miðnám, Akademikarafelag Føroya, Farmakonomforeningen, Yngri Læknar Føroyar, Kost- og føðslufelagið, Fysioterapeutfelag Føroya, Føroya Tekniska Lærarafelag og Pharma Danmark.

Harumframt eru eisini gjørdar eitt ára semjur gjørdar við hesi fimm feløgini: Ergoterapeutfelagið, Bioanalytikarafelagið, Musikklærarafelag Føroya, Felagið Maritimir Lærarar og Tænastumannafelagið.

Onnur fakfeløg eru eisini innkallað til samráðingar, og samráðingarnar eru byrjaðar við millum annað Føroya lærarafelag, Felagið Føroyskir sjúkrarøktarfrøðingar og Føroya Pedagogfelag.