Løgreglan kannar framvegis deyðsfallið í Fuglafirði

Løgreglan kannar framvegis orsøkina, hví ein ungur maður lat lív í Fuglafirði í gjár.

Maðurin varð funnin lívleysur, uttan fyri eini sethús, stutt eftir klokkan eitt seinnapartin í gjár.

- Kanningararbeiðið heldur fram. Vit gera alt fyri at lýsa so neyvt sum til ber, hvat er farið fram, sigur Kári Jacobsen, kanningarleiðari hjá løgregluni.

Avhoyringar eru gjørdar, eins og økið, har maðurin var funnin í gjár, er kannað.

Kári Jacobsen sigur seg ikki fáa sagt stórvegis um málið, áðrenn tað er liðugt kannað.

- Enn eru vit ikki komin til nakra niðurstøðu, og tí fái eg illa úttalað meg um málið. Heldur ikki, um nakað revsivert er farið fram, sigur Kári Jacobsen, kanningarleiðari hjá løgregluni.

Hann dugir í løtuni ikki at siga, nær kanningarnar eru lidnar.