Ráðharrar og tingfólk leggja trýst á Starmer

Grundarlagið undir forsætisráðharrasessinum hjá Keir Starmer ridlar, nú fjórði ráðharrin fyri Labour seinnapartin boðaði frá, at hann leggur ráðharrasessin frá sær, skriva The Guardian og bretska kringvarpið, BBC.

- Seinastu dagarnir hava víst, at bretski almenningurin hevur mist álitið á tær sum forsætisráðharra. Álitið stendur ikki til at bjarga, skrivar fráfarandi bretski heilsumálaráðharrin, Zubir Ahmed, á sosiala miðilin, X.

Tríggir ráðharrar fyri Labour, Alex Davies Jones, Jess Phillips og Miatta FahnBulleh, hava í dag lagt ráðharrasessin frá sær.

Tingfólk hjá Labour vilja hava formansval

Meira enn 80 tingfólk hava boðað alment frá, at tey taka undir við nýggjum formansvali. Sambært LabourList, taka 88 tingfólk hjá Labour undir við nýggjum formansvali, skrivar bretska kringvarpið.

Fyri at seta formansval á skrá, krevst stuðul frá 81 av teimum 403 tinglimunum hjá Labour.

Góð hundrað tingfólk fyri Labour hava hinvegin skrivað undir bræv, sum stuðlar bretska forsætisráðharranum.

Hóast vaksandi trýstið, hevur skrivstovan hjá bretska forsætisráðharranum boðað frá, at Starmer heldur fram í starvinum. 

Bretski forsætisráðharrin er trýstur eftir ósigurin hjá flokkinum á bretska lokalvalinum í seinastu viku.