Ukraina fær stuðul til orku og verju frá sameindum í Evropa

Ukraina hevur gjørt avtalu við sameind í Evropa um nýggjar stuðulspakkar til orku og verjuøkið undan fýra ára degnum fyri russisku innrásina í landið.

Tað boðaði ukrainski forsetin, Volodymyr Zelenskyj, forseti, frá í gjár á miðlinum X.

- Í München eru vit vorðin samd við leiðararnar í Berlin-bólkinum um ítøkiligar hjálparpakkar til orku- og hernaðarøkið til Ukraina fyri 24. februar, skrivar Zelenskyj.

Á trygdarráðstevnuni í München hitti Zelenskyj leygardagin eisini amerikanska uttanríkisráðharran, Marco Rubio.

Tað skrivar Kyiv Post.

Sambært ukrainska forsetanum, greiddi hann Rubio frá støðuni á hermótinum, framhaldandi russisku álopunum og avleiðingunum av álopunum á orkukervið í Ukraina.

Teir báðir umrøddu eisini diplomatisku tilgongdina og komandi trílandasamráðingarnar, men Zelenskyj segði tó einki um, hvat ítøkiligt kom fram  á fundinum.

- Tað er umráðandi, at framstig eru um trygdargaranti og búskaparliga endurreising, segði hann.

Næstu samráðingarnar millum USA, Russland og Ukraina verða eftir ætlan í morgin og í ovurmorgin í Geneve.