Uttanríkisráðharrin hjá ES: Russland vinnur ikki á hermótinum

Trygdarráðstevnan í Múnchen, sum byrjaði fríggjadagin, endar ídag.

Í morgun hevur uttanríkisráðharrin hjá ES, Kaja Kallas, hildið røðu.

Í røðu síni segði hon millum annað, at Russland er ikki eitt stórveldi.

- Eftir meira enn eitt áratíggju, har Russland hevur verið í stríði, harav fýra ár í beinleiðis kríggi við Ukraina, hevur landið ikki megnað at víðka síni landamørk síðani 2014, segði Kaja Kallas millum annað í røðuni.

ES-uttanríkisráðharrin legði afturat, at Russland nú er farið á húsagang, landið hevur ikki møguleika at selja orku til evropeiska marknaðin, og fólkið í landinum flýggjar. 

- Í løtuni vinnur Putin bara við samráðingarborðið, ikki á hermótinum, segði Kaja Kallas í morgun.

Hon nevndi tríggjar raðfestingar, sum ES nú fer undir:

ES skal hava eina nýggja trygdarstrategi, har verjan av Evropa byrjar í Ukraina. Støðufesti skal fáast í grannalondunum hjá ES, bæði fyri sunnan og eystan. Og altjóða samstørv - eitt nú handilsavtalur og samstørv um trygd og verju - skulu styrja ES.

Kaja Kallas heldur tó ikki, at ES skal seta á stovn sína egnu, sjálvstøðu hermegi. Hon vísir á, at longu nú hava øll lond í Evropa sín egna her, og 23 av ES-londunum eru longu limir í Nato. 

Hon mælir í staðin til styrkt samstarv millum londini í Evropa, soleiðis at tey í felag kunnu fáa ein sterkari leiklut í Nato.

Nú klokkan hálvgum ellivu heldur fyrrverandi Nato-aðalskrivarin, Jens Stoltenberg, røðu á trygdarráðstevnuni í Múnchen. Hann skal tosa um at verja evropeisk virði.