Ragnar í Filipsoyggjunum: Av ringasta veðri

Tíðarskeiðið hetta til jóla plagar at vera buldrasligt í Filipsoyggjunum, og tað kemur eisini javnan fyri, at vit hoyra, at tyfonir, flóðaldur og annað mangt gera um seg.

At tað hendir beint nú er einki at siga til, tí hetta er tað tíðarskeiðið, tá tyfonirnar, sum á føroyskum verður kallað ein tropisk ódn, gera um seg. Og henda seinasta vikan hevur verið hørð við tey í Filipsoyggjunum.

Tað váttar Ragnar Niclasen, sum býr í Baguio á oynni Luzon, sum er tann norðasta oyggin í landinum og sum er oyggin, har høvuðsstaðurin, Manila, liggur.

Ragnar Niclasen, sum er ættaður úr Klaksvík, hevur, saman við kanadisku konu síðni Elisabeth, ella Liz, sum hon eisini verður kallað, búð í Filipsoyggjunum síðan 1979, har hann arbeiðir sum trúboðari.

- Tað hevur verið kolandi stormur, við rættiliga nógvum vindi. Tað sum eg las á netinum áðrenn hon rakti land var, at hon máldi upp til tætt við 200 kilometrar um tíman. So tað er nógvur vindur og nógv regn, rættiliga nógv regn, sigur Ragnar Niclasen, sum leggur afturat, at tað hevur regnað so nógv, at tað næstan er farið ígjøgnum heilt.

Fung-Wong-ódnin er sum sagt onnur ódnin uppá eina viku, tí fyri slakari viku síðan rakti ódnin Kalmaegi landið, og hon kravdi 200 mannalív.

Heilt hvussu illa statt tað er nú, er ov tíðliga at siga enn. Men greitt er, eisini út frá myndum úr landinum, at har er nógv at rudda upp.

Trýst á pílin niðanfyri og hoyr alt innslagið, sum var í sendingin klokkan 18.