Skiftisár raka harðari og fyrri

- Hon er sera áhugaverd. Eg veit ikki, um eg eri so bilsin av úrslitunum, men her kemur avgjørt nakað nýtt fram.

Orðini eigur Katrin Kallsberg, serlækni í kvinnusjúkum, um størstu donsku kanningina nakrantíð, sum er gjørd um heilsu og trivna hjá kvinnum í Danmark.

Stóra kanningin, sum verður nevnd KISO-kanningin, er gjørd av granskarum á Universitetinum í Keypmannahavn, og útvið 154.000 kvinnur hava svarað spurnarblaði. Omanfyri 500.000 kvinnur fingu spurnarblaðið. 

Kanningin vísir millum annað, at heili 97 prosent av kvinnum millum 45 og 59 ár hava symptomir upp á skiftisár, og skiftisár byrja væl fyrr, enn áður hildið.

Sambært Katrini Kallsberg hevur henda kanningin stóran týdning og fer eisini at hava eina ávirkan á, hvussu samfelagið skilir skiftisárini. 

- Heilt skjótt rokni eg við, at tað verður meira alment accepterað, at tað eru skiftisártrupulleikar, tá mann hevur ymisk symptomir og ikki bara hitatúrar. Tað kemur at vera vanligt, at tá tú fert til kommunulækna at kanna eitthvørt, so verða skiftisárini ein púra natúrligur partur, sum mann líka tekur upp. Tað verður nakað fullkomiliga normalt at tosa opið um eisini, sigur Katrin Kallsberg.