Bundesligan: Elias bestur í september

Elias Ellefsen á Skipagøtu er kosin at vera besti spælarin í týsku Bundesliguni í september.

Spælskiparin fær sostatt eina viðurkenning fyri fleiri framúr avrik fyrsta landskappingarmánaðin fyri THW Kiel, sum liggur fremst í deildini við fullum stigatali.

Føroyingurin var nøkulunda javnur við íslendska Ómar Inga Magnússon í áskoðaraatkvøðugreiðsluni, men venjarar og liðskiparar høvdu Elias Ellefsen á Skipagøtu frammanfyri.

Føroyska stjørnan fekk smá 40 prosent av atkvøðunum, men Ómar Ingi Magnússon fekk góð 27 prosent.

Liðfelagin úr Keil Andreas Wolff var eisini í uppskoti til heiðurin. Týska stórfelagið, sum ikki ordiliga hevur bjóðað av um týska meistaraheitið síðstu árini, hevur vunnið allar seks dystirnar higartil, og Elias Ellefsen á Skipagøtu hevur skotið ikki færri enn 43 av málunum og hevur víst satt stórspæl í fleiri av dystunum.

Flensburg er á 2. plássi, og júst har skal Kiel á vitjan um eina góða viku, men fyrst er heimadystur ímóti Rhein-Neckar Löwen á skránni.

Her sæst eitt longri brot við summum av framúrskarandi avrikunum hjá Eliasi seinasta mánaðin.