Javni sóknast eftir nissuhúgvum

Javni hevur leingi viljað gjørt altjóða brekdagin sjónligari í Føroyum, men tað hevur víst seg at vera trupult, tí 3. desember eru fólk bundin av so mongum øðrum.

Nú verður farið undir nýtt tiltak, sum hevur til endamáls at fáa so nógv sum gjørligt at binda eina nissuhúgvu til Javna.

Katrin Jacobæus, dagligur leiðari hjá Javna, sigur, at endamálið bæði er at varpa ljós á altjóða brekdagin og savna pening til Javna.

Uppskriftin sæst á hesum leinki, men ymiskar húgvur eru vælkomnar. Tiltakið endar við nissuhúgvusølu tann 3. desember.

- Hetta binditiltakið er eitt gott amboð - bæði tí tað er hugnaligt og gevandi hjá teimum, sum binda, og tí húgvurnar kunnu gleða onnur og samstundis geva Javna fíggjarligan stuðul.

Hetta uttan at fólk skulu geva pening beinleiðis, vísir Katrin Jacobæus á.