Brunaeftirlitið veit einki um eldsbruna

Arbeiðs- og Brunaeftirlitið hevur einki mál, sum beinleiðis er um eldsbrunan á Varðanum Pelagic á Tvøroyri í 2017. 

Tað er ikki ein partur av myndugleikaøkinum hjá Arbeiðs- og Brunaeftirlitinum at kanna, eftirmeta ella gera niðurstøður í málum um eldsbruna. 

Hetta er myndugleikaøkið hjá løgregluni.

Arbeiðs- og Brunaeftirlitið veit, at løgreglan kannaði málið, men liggur ikki inni við frágreiðing um málið.

Arbeiðs- og Brunaeftirlitið hevur kannað, um onnur mál eru í journalskipanini, men hevur bara mál um arbeiðstrygd í sambandi við uppruddingina og niðurtøkuna.

Tað er svarið, sum felagsskapurin Livilig kor á Tvøroyri fekk frá Arbeiðs- og Brunaeftirlitinum, tá felagsskapurin bað um innlit í frágreiðingina um eldin í Varðanum Pelagic.

Leingi at bíða

Men av øðrum orsøkum endaði hetta málið hjá Løgtingsins umboðsmanni.

Tí Arbeiðs- og Brunaeftirlitið brúkti hálvan fjórða mánað at svara umbønini um innlit.

Markið at svara innlitsumbøn er tíggju dagar. 

Løgtingsins umboðsmaður heldur tað vera átaluvert, serliga tá Arbeiðs- og Brunaeftirlitið í svarinum sigur, at stovnurin ikki hevur skjøl, sum innlitsumbønin er um. 

Umboðsmaðurin sigur, at ovurhonds stór arbeiðsbyrða og sjúka, sum Arbeiðs- og Brunaeftirlitið segði vóru orsøkin, er eingin umbering.

Men umboðsmaðurin tók til eftirtektar frágreiðingina hjá Arbeiðs- og Brunaeftirlitinum um, at stovnurin nú hevur bøtt um sínar innanhýsis arbeiðsgongdir, so støður sum hesar ikki skulu koma fyri aftur.