Mótmæla banni ímóti Pride gongu í Budapest

Tíggjutúsundtals mótmælisfólk frá eini tredivu ymiskum londum eru savnað í ungarska høvuðstaðnum at mótmæla banninum móti Pride. Tað skrivar danska kringvarpið, DR.

Bannið móti pride gonguni varð samtykt í ungarska tjóðartinginum í mars. Tað er Viktor Orbán, ungarski forsetisráðharrin og flokkur hansara Fidesz, virkaðu  fyri at banna Pride gonguni. 

Viktor Orban hevur eisini hótt við, at tað fer at fáa rættarligar avleiðingar, um fólk luttóku í Pride gonguni í dag. 

Gott lag er á pride gonguni, og hóast ferðsluruðuleika og mótmæli móti pride gonguni, er gongan farin fram friðarliga higartil, sigur danska kringvarpið.

Mótmælisgongan móti pridegonguni, har millum annað ein nýnasistiskur bólkur er við, varð steðgað av ungarsku løgregluni á eini brúgv, og tað hevur ikki eydnast at koma nær at pride gongini, sigur ungarski miðilin, sum eitur 444. Hu, sambært DR.