Fátækaváðin er framvegis 7,6 prosent

Fátækaváðin í Føroyum var framvegis 7,6 prosent í 2023.

Tað hevur hann verið síðani 2019, tá hann fór úr 9,7 prosentum niður í 7,6 prosent, skrivar Hagstovan.

Fátækaváðin sigur, hvussu nógv fólk hava javnvirðisinntøku, sum er minni enn 60 prosent av miðjavnvirðisinntøkuni í samfelagnum. 

Javnvirðisinntøka er ein umroknað tøk inntøka hjá hvørjum einstøkum við atliti at vaksnum og børnum í húskinum. 

Øll í húskinum, børn og vaksin, fáa tillutað somu javnvirðisinntøku.

Á heimasíðuni hjá Hagstovuni er frágreiðing um javnvirðisinntøkuna. 

Størri fátækaváði er sunnanfyri.

Í Sandoyarøkinum var hann 10,4 prosent í 2023.

10,9 prosent vóru undir fátækaváðamarkinum í Suðuroynni. 

Minstur er fátækaváðin í Eysturoyarøki og í Vága øki, ávikavist 6,5 og 7,0 prosent.

Orsøkin til fallið frá 2018 til 2019 var einamest, tí fólkapensjónistar fóru upp um fátækaváðamarkið í 2019 og vóru har framvegis í 2023.