Tað var eitt ógloymandi kvøld fyri okkum allar

Hóskvøldið varð størsta danska tónleikavirðislønin - Sonningvirðislønin, ið er uppá eina millión krónur, latin Den Danske Strygekvartet, og tað var Fríðrikur kongur, ið handaði virðislønina - og hetta er fyrsta ferðin, at virðislønin verður latin einum ensembli ella bólki.

Limirnir í Den Danske Strygekvartet eru Rune Tonsgaard Sørensen, violin; Frederik Øland, violin; Asbjørn Nørgaard, bratsch; og Frederik Sjölin, ið spælur cello.

Og sum nevnt er ein av limunum í Den Danske Strygekvartet, Rune Tonsgaard Sørensen, hálvur føroyingur - pápin er Bjarni Næs Sørensen úr Havn.

Hetta var ein stór løta, sigur Rune, ið sum partur av Den Danske Strygekvartet fekk handaða virðislønina í konserthøllini hjá Det Kongelige Musik-konservatorium, og tað var júst í somu hølum, at somu tónleikarar sum tannáringar vunnu kappingina hjá P2 fyri kamartónleik. Vit hava leingi glett okkum til hetta kvøldið. At standa á pallinum í einum fyltum konsertsali við einum stórum symfoniorkestri, og so fáa virðislønina handaða av ongum minni enn Hansara Hátign. Tað var ómetaliga stórsligið og nakað, sum vit ongantíð fara at gloyma, sigur Rune.

Den Danske Strygekvartet á palli saman við stórum symfoniorkestri hóskvøldið.jpg

Manningin í Den Danske Strygekvartet hava kenst síðani teir vóru tannáringar, og teir hittust fyrstu ferð á einum háskúla, har ið teir luttóku á einum summartiltaki fyri amatørtónleikarar.

Den Danske Strygekvartet.jpg

Rune Tonsgaard Sørensen spælur eisini við í bólkinum Dreamers Circus, ið eitt nú hevur latið úr hondum eina útgávu saman við Teiti. 

Tú kanst hoyra samrøðuna við Rune Tonsgaard Sørensen her!