Georgia - Føroyar: Blanda kortini í Tblisi

Landsliðsvenjarin, Eyðun Klakstein fær kjansin at blanda kortini av nýggjum, tá Georgia tekur ímóti Føroyum í venjingardysti í Tblisi seinnapartin.

Onkur av yngru spælarunum fara at fáa møguleikan, og taktiskt er ætlanin at royna okkurt nýtt.

 - Vit kunnu rokna við, at onkur spælari, sum hevur havt stóran leiklut, ikki fær so stóran leiklut ímóti Georgia, og vit kunnu rokna við, at onkur, sum ikki hevur havt stóran leiklut seinnu árini, fær størri leiklut í dystinum ímóti Georgia, sigur Eyðun Klakstein við FSF Varpið.

 - Men í útgangsstøði koma vit at kenna liðið aftur frá undanfarnu dystunum, og at hetta er góð fyrireiking til HM undankappingardystin móti Gibraltar.

Fyrireiking til lykladyst

Føroyska landsliðið setti kós ímóti Georgia mánadagin, og í morgin gongur leiðin heimaftur, har fyrireikingarnar til dystin ímóti Gibraltar halda fram. Júst tann dysturin kann sigast at vera lykladysturin hjá Føroyum í hesi undankappingini, og verður samstundis fyrsti heimadysturin við Eyðuni Klakstein og Atla Gregersen á síðulinjuni.

 - Tá koma vit í støðuna, har vit rokna okkum sjálvar sum favorittar at vinna og ætla at vinna dystin. So vit gleða okkum til eitt gott kvøld á Tórsvølli, og vit vóna, at nógv fólk fara at stuðla okkum og hyggja, so vit fáa eina góða løtu saman 2. hvítusunnukvøld, sigur Eyðun Klakstein við heimasíðuna hjá Fótbóltssambandinum. 

Venjingardysturin millum Georgia og Føroyar verður spældur á Dinamo Arena í georgiska høvuðsstanum, Tblisi. Talan er um eitt risastórt stadion, ið hevur pláss fyri umleið 54.000 áskoðarum.

Kringvarp Føroya vísir dystin í sjónvarpinum klokkan 16.50.