Trump leggur 100 prosent toll á útlendskar filmar

Amerikanski filmsídnaðurin er á gravarbakka, og tað er ein trygdarhóttan, sigur amerikanski forsetin, Donald Trump. 

Hann ávarar um 100 prosent í tolli á útlendskar filmar.

- Onnur lond gera slíkar skipanir fyri at lokka tey, sum gera film og filmsstovur, úr USA. Hollywood og nógv onnur støð í USA tømast. Hetta er samskipað átak hjá øðrum londum, og tí ein trygdarhóttan, skrivar Trump á Truth Sosial.

- Eg gevi handilsmálaráðnum og amerikonsku handilsumboðunum boð um alt fyri eitt at fara undir tilgongdina at leggja 100 prosent toll á allar filmar, sum koma til USA, og sum eru framleiddir í øðrum londum. Vit skulu gera filmar, framleiddir í USA, stórfingnar aftur, skrivar Trump á sínum egna sosiala miðli Truth Social.

Hann nevnir einki um, nær tollurin kemur í gildi.