Løgd undir at blanda seg í donsk viðurskifti

Føroysku fólkatingslimirnir Anna Falkenberg og Sjúrður Skaale boða í dag frá, at tey bæði stuðla danska veðurlagsmálaráðharranum Lars Aagaard, sum er í vanda fyri at verða koyrdur frá av Fólkatinginum.

Andstøðan fer allarhelst at leggja misálit fram móti Lars Aagaard, eftir at hann tilvitað hevur afturhildið upplýsingar í sambandi við grøna orkuskiftið í Danmark.

Men føroysku fólkatingslimirnir hava, saman við grønlendska fólkatingsliminum Aaju Chemnitz, í tíðindaskrivi boðað frá, at tey stuðla Lars Aagaard í hesum málinum.

Tað hevur ført til undran eins væl og atfinningar í Fólkatinginum, tí tað er ikki vanligt, at norðuratlantisku umboðini blanda seg beinleiðis upp í donsk viðurskifti.

SF hevur funnist at hesum, og Torsten Gejl, framsøgufólk hjá Alternativet í veðurlagsmálum, undrast á, hví norðuratlantisku tinglimirnir blanda seg í, um Fólkatingið hevur álit á veðurlagsráðharranum.

"Eg haldi hetta er óhóskandi uppílegging í danskan innanríkispolitikk", sigur Torsten Gejl við Ritzau.

Onga viðmerking

Tað er ikki eydnast okkum at fáa orðið á Sjúrð Skaale, fólkatingsmann, men vit hava fingið fatur á Onnu Falkenberg.

Hon sigur, at tey eru samd um ikki at viðmerkja málið meira, men vísa til tíðindaskrivið, sum varð sent út fyrr í dag.

"Vit hava álit á, at ráðharrin frameftir fer at kunna og taka Fólkatingið við á nøktandi hátt. Tí stuðla vit ráðharranum og stjórnini sum heild", siga tey trý í tíðindaskrivinum.

Tey leggja tó afturat, at tað er átaluvert og harmiligt, at Lars Aagaard hevur afturhildið upplýsingum.

Men tey vísa á, at ráðharrin hevur biðið um umbering og ásannað, at kunningin ikki var nøktandi.

Fólkatingið skal í morgin taka støðu til, um tað skal fáa nakrar avleiðingar fyri Lars Aagaard, at hann afturhelt upplýsingum fyri tinginum.