Heldur fram sum formaður í Føroya Handverkarafelag

Suni Simonsen heldur fram sum formaður í Føroya Handverkarafelag.

Freistin at stilla upp til formansvalið á aðalfundinum, sum verður í vár, var úti 1. februar, og einki mótvalevni stillar upp. Sostatt er greitt, at Suni Simonsen heldur fram í eitt fýra ára skeið aftrat.

Suni Simonsen varð fyrstu ferð valdur í stjórnina hjá Føroya Handverkarafelag í 1990. Í 1996 bleiv hann næstformaður í felagnum, og tað var hann til 2011, tá hann varð valdur til formann.

Føroya Handverkarafelag er meginfelagið hjá handverkarafeløgunum kring landið.

Sjey feløg eru í løtuni limir í Føroya Handverkarafelag. Tey eru Fuglafjarðar Handverkarafelag, Føroya Flogteknikarafelag, Klaksvíkar Handverkarafelag, Nes Sóknar Handverkarafelag, Norðstreymoyar Handverkarafelag, Vága Handverkarafelag og Vestmanna Handverkarafelag. 

Í alt eru umleið 1.200 limir í Føroya Handverkarafelag.