Hava nú rætt til at siga nei til at verða kveikt til lívs aftur

Ynskja danir, at heilsustarvsfólk ikki skulu kveikja tey til lívs aftur, eftir ein hjartasteðg til dømis, so fer frá í morgin av at bera til at melda hetta frá umvegis heimasíðuna sundhed.dk ella við at senda eina umsókn um hetta til danska Innlendis- og heilsumálaráðið, skrivar DR.

Tað skulu ganga sjey dagar frá tí, at tú skrásetir títt val, til tað fær gildi. Bíðitíðin upp á sjey dagar er fyri at tryggja, at avgerðin er væl umhugsað.

Lógin varð samtykt í desember 2023. Síðani tá hevur Styrelsen for Patientsikkerhed havt eitt kunningarátak, sum er ætlað heilsustarvsfólki fyri at tryggja, at tey eru tilvitað um nýggja rættin.

Frávelja fólk møguleikan at verða uppafturlívgað, so er tað bert galdandi fyri starvsfólk í danska heilsuverkinum. 

Danska Innlendis- og heilsumálaráðið skrivar á heimasíðu sínari, at síggja fólk onkran fáa hjartasteðg, so skulu fólk framvegis veita fyrstuhjálp ella ringja eftir hjálp.