Maskinfólk, námsfrøðingar og tónleikarar eru í vandabólkinum

Ongin kanning um tinnitus er áður gjørd í Føroyum, men nú hevur Granskingarráðið játtað HOYR 193.054 krónur til verkætlanina "Títtleikin av tinnitus í Føroyum, og hvussu tinnitus ávirkar arbeiðsførleikar".
Við hesari kanningini, ið verður skipað sum eina spurnarkanning á netinum, er ætlanin at finna fram til hvussu nógvir føroyingar hava tinnitus og hvussu hetta ávirkar arbeiðsdagin, arbeiðsorkuna og arbeiðsmarknaðin.

Okkara varhugi er at nógvir føroyingar hava tinnitus, siga Ása Olsen, forkvinna í HOYR, og Jensia Olsen, verkætlanarleiðari, samstundis sum tær vísa á, at fólk í øllum aldursbólkum verða rakt av tinnitus.

Tað eru tey, sum lýsa tinnitus, sum tøgnina, ið hvarv, og hetta hevur við sær eina verri lívsgóðsku.

Verkætlanin hjá HOYR um tinnitus í Føroyum fer av barkastokki í næstum, og miða verður eftir at so nógv fólk sum gjørligt fara at svara talgildu spurningunum. Hetta verður millum annað at síggja á heimasíðuni hjá HOYR - hoyr.fo
Kanningarúrslitið verður tókt í summar.