Skil fíggjarlógina

Hvat er fíggjarlógin? 

Stýrisskipanarlógin sigur: 

§ 43. Fyri 1. oktober á hvørjum ári leggur landsstýrið fyri løgtingið uppskot um løgtingsfíggjarlóg fyri komandi álmanakkaár. 

Stk. 2. Eingin útreiðsla má verða goldin, uttan at heimild er fyri henni í teirri fíggjarlóg, ella aðrari játtanarlóg, ið er í gildi, tá ið ávíst verður. Tó kann í tíðarskeiðinum fram til 1. apríl, eftir at fíggjarárið er endað, verða ávístur peningur av farnu fíggjarlógini fyri útreiðslur, ið havdar eru í farna fíggjarári. 

Stk. 3. Um útlit eru til, at uppskot til fíggjarlóg ikki er liðugt viðgjørt fyri fíggjarársbyrjan, leggur landsstýrið fram uppskot um eina bráðfeingis játtanarlóg. 

Hví skal løgtingið samtykka eina fíggjarlóg á hvørjum ári? 

Tað er nakað tað sama sum tá eitt húsarhald leggur sær eina ætlan yvir inntøkur og útreiðslur. Við fíggjarlógini kann løgtingið hvørt ár fylgja við, hvussu nógv landið fær inn og hvussu nógvir pengar skulu brúkast. 

Hvør er mannagongdin? 

Í ár legði Ruth Vang, landsstýriskvinna í fíggjarmálum, uppskot til fíggjarlóg fram 30. September. Síðan var 1. viðgerð av uppskotinum í løgtinginum 2. oktober, har málið varð koyrt í fíggjarnevndina.

Týsdagin 16. desember samtykti løgtingið fíggjarlógina til 2. viðgerð. Í dag er so 3. viðgerð og um hon verður samtykt í dag er tað endaligt.  

Umrøða av fíggjarlógini 

Samlaða úrslitið á fíggjarlógini er eitt hall á 120,3 mió. krónur.

"Tað er ikki so stórt í mun til BTÚ, men tá skulu vit hava í huga, at tað er í góðum tíðum, tá tað annars gongur væl í búskapinum. Tá eiga vit at hava yvirskot," sigur Johnny í Grótinum, búskaparfrøðingur og formaður í Búskaparráðnum. 

Hann heldur, at tað er ein óvani ella óskikkur, at Fíggjarnevndin fer inn og sker ymiskt burtur og setur annað inn, tá politiska skipanin annars er vorðin samd um eina fíggjarlóg. 

Fíggjarlógin var eisini evni í Breddanum týsdagin 17. desember, har Johnny í Grótinum, formaður í Búskaparráðnum, eisini var gestur. 

Breddin-sendingamynd

>>Hoyr Breddan um fíggjarlógina HER