Føroya Symfoniorkestur og Eivør í Lívdini og DR Konserthúsi

Hósdagin 8. og leygarkvøldið 10. august spælir Føroya Symfoniorkestur fyri fyrstu ferð í Lívdini í Havn og í Konserthúsinum hjá Danmarks Radio í Keypmannahavn.

Solistur verður eingin minni enn Eivør, ið má roknast sum bjartasta stjørnan í føroyska tónleikaheiminum.

Eivør hevur útgivið 10 fløgur í egnum navni, og hon hevur eitt nú arbeitt saman við Ásgeir Trausti, John Grant, Einar Selvik (Wardruna) og Dan Heath (Lana Del Ray). Í 2021 vann hon tónleikavirðisløn frá Norðurlandaráðnum, og sama ár fekk hon eisini riddarakrossin frá danska kongshúsinum.

Eivør hevur eisini gjørt tónleikin til Netflix-røðina The Last Kingdom og hevur framført í sambandi við 10-ára heiðurssýning hjá Game Awards í The Hollywood Bowl í Los Angeles.

Marius, Marius Ziska, Føroya Symfoniorkestur

Mynd: Finnur Justinussen / leit.fo

Fjølbroytt konsertskrá

Fleiri føroysk tónaskøld eru á skránni á konsertunum hjá Føroya Symfoniorkestir. Frumframførsla verður av verkinum ”Tónar úr innastu tøgnini” eftir Sunleif Rasmussen.

Marius Ziska, Marius, Føroya Symfoniorkestur, Hans Marius Ziska, Eivør Pálsdóttir

Eivør var á pallinum saman við Føroya Symfoniorkestri, tá orkestrið spældi konsertir saman við Mariusi (Mynd: Finnur Justinussen / leit.fo)

Eivør framførir egin løg, har Marjun Syderbø Kjelnes hevur skrivað tekstin, og Tróndur Bogason hevur útsett tónleikin fyri symfoniorkestur. Eisini syngur hon tveir sálmar.

Eftir steðgin framførir symfoniorkestrið 5. symfoni hjá Tjajkovskij. Symfoniin, ið er í fýra satsum, varð fyrstu ferð framførd í Mariinskij sjónleikarhúsinum í Sankta Pætursborg í 1888. Verkið verður mett sum eitt av størstu verkunum, sum Tjajkovskij skrivaði.

Marius Ziska, Marius, Føroya Symfoniorkestur, Bernhardur Wilkinson

Mynd: Finnur Justinussen / leit.fo

Bernhardur Wilkinson stjórnar Føroya symfoniorkestri til hesar heilt serligu og søguligu konsertirnar.

Konsertin í Lívdini er útseld, men enn eru nøkur atgongumerki eftir til konsertina í Keypmannahavn, boðar Føroya symfoniorkestur frá í tíðindaskrivi.