Sára Maria Johansen: "Eg vil gjarna rógva víðari við áttaranum"

Sára Maria Johansen úr Froðba harmaðist um, at OL-luttøkan fyri danska áttaran við kvinnunum nú er av. 

"Tað eru heimsins bestu rógvarar, ið vit kappast ímóti, so tann sannroynd at vit endaðu nummar sjey merkir, at vit eru sjeynd best í heiminum. Vit hava vunnið á stórum rógvitjóðum ávegis hertil. Kina vann bronsu við seinasta OL, men vit hava sligið tær út í ár. Tað fara vit ongantíð at gloyma, og tað kunnu vit taka við okkum víðari", staðfesti Sára Maria Johansen, tá Jakob Melgaard, journalistur, fekk orðið á hana beint eftir róðurin. 

Heldur OL-áttarin fram at rógva saman?

"Tað veit eg ikki. Tað avgerð danska ítróttasambandið, Team Danmark og danska rógvisambandið. Men eg vil gjarna halda fram. Eg vóni, at hetta bara er byrjanin hjá danska áttaranum.

Dreymaáttarin!

"Tað er framvegis dreymaáttarin, tí tá mann hevur torað at droymt stórt, og tað endar her, so er tað harmiligt. Nú eru vit níggju vinkonur, ið hava tað gott saman. Vit fara aftur til OL-býin at njóta OL sum olympisk ítróttafólk, og so skulu vit út at stuðla hinum donskum ítróttafólkunum", segði Sára Maria Johansen, áðrenn hon fór yvir at geva sjeikinum og pápanum, ið vóru komnir til París at stuðla, eitt klemm.