Georgia spælir EM-fótbólt fyri fyrstu ferð

Georgia spælir EM-fótbólt fyri fyrstu ferð
Í dag spælir Georgia fyri fyrstu ferð í einum EM-endaspæli í fótbólti. Mótstøðuliðið á Signal Iduna Park er Turkaland.
Georgisku viðhaldsfólkini í miðbýnum í Dortmund gleða seg til fyrsta EM-dystin í dag
Mynd: Leon Kuegeler/Reuters/Ritzau Scanpix  
 
18.06.2024 - 12:17

Seinnapartin fer Georgia á vøllin at spæla EM-fótbólt fyri fyrstu ferð.

Eysturevropeiska landið, sum gjørdist sjálvstøðugt í 1991, eftir at Sovjetsamveldið fall, hittir Turkaland í søguliga dystinum á Signal Iduna Park klokkan 17.00.

Georgia spældi seg til endaspælið við at vinna dramatiskan playoff-dyst á Grikkalandi eftir brotssparkskapping, og í berum ovfarakæti hátíðarhildu fólk sigurin á gøtunum í høvuðsstaðnum, Tbilisi, til morgunin eftir.

 


Nógv viðhaldsfólk eru komin til Týsklands úr Georgia. MYND: Leon Kuegeler/Reuters/Ritzau Scanpix

 

'Kvaradona' gongur á odda

Størsta stjørnan hjá Georgia er Khvicha Kvaratskhelia. 23 ára gamli vongurin var í fjør við til at tryggja Napoli fyrsta meistaraheitið, síðan Diego Maradona var í hæddini í fýrsunum.

Av hesum og av eyðkenda ágangandi spælistílinum verður hann nevndur 'Kvaradona'. Vongurin er lyklaspælari hjá Georgia, men aðrir eru eisini. Giorgi Chakvetadze hevur spælt væl fyri Watford í næstbestu ensku deildini, og málverjin, Giorgi Mamardashvili, er fyrsta val í málinum hjá spanska felagnum Valencia.

Á odda fyri liðnum er fyrrverandi franski landsliðsbakkurin Willy Sagnol, sum var settur í 2021.

 

Ronaldo er aftur í yndiskappingini

Portugal telist millum favorittarnar at vinna EM-endaspælið í Týsklandi, saman við Fraklandi og Onglandi.

Skal tað eydnast, skal Cristiano Ronaldo spæla væl í yndiskappingini, sum Portugal vann í 2016. 39 ára gamli framherjin, sum nú spælir við Al Nassr í Saudi Arabia, eigur bæði mál- og dystarmetið í EM-høpi, og saman við 41 ára gamla verjuskansanum Pepé, skal hann ganga á odda fyri portugisiska hópinum, sum á pappírinum er sera sterkur.

Portugal byrjar EM-endaspælið við dysti ímóti Kekkia á Red Bull Arena í Leipzig klokkan 20.00

Er kopiera
Nýggjastu sendingar í ÚV
Leygardag 20. juli
Morgunlestur leygardagur 20. juli 2024
177838
Fríggjadag 19. juli
Morgunlestur fríggjadagur 19. juli 2024
177837
Hósdag 18. juli
RagnarRokk 18.juli 2024
176485
Nýggjastu sendingar í SV
Fríggjadag 19. juli
Veðrið
178247
Fríggjadag 19. juli
Óli Mittún og Eivør Pálsdóttir
178182
Týsdag 16. juli
Veðrið
178118
Mánadag 15. juli
Hin rusuti á Aconcagua (3:10)
177771
Leygardag 13. juli
Føroyar - Montenegro (2-1)
178016