Svøríki vil ikki hækka prísin á snúsi

Sviar eru stórbrúkarar av snúsi, og svenski ES-nevndarlimurin, Ylva Johansson, sigur, at Svøríki undir ongum umstøðum fer at taka undir við uppskotinum frá ES-nevndini um at tvífalda prísin á snúsi.

Svenska Aftonbladet avdúkaði leygardagin eitt loyniligt uppskot um nýggjar reglur um skatt á tubbak, har snús verður roknað sum aðrar tubbaksvørur.

Skattapakkin, sum italski nevndarlimurin, Paolo Genitioni, er komin við, skuldi eftir ætlan setast í gildi í desember.

Hetta er dagføring av gamla tubbaksskattinum, sum fevnir um nýggjar vørur, sum ikki vóru til fyrr, eitt nú e-sigarettir, tubbak sum verður hitað upp, men ikki brennist, og nikotinvørur við ongum tubbaki, og so snús, skrivar NTB.