Moody´s: sama skoðsmálið men útlitini eru negativ

Føroyar varðveita sítt skoðsmál, sína rating, hjá ratingarfyritøkuni Moody’s.

Aftur í ár fáa Føroyar skoðsmálið Aa3, men við negativum útlitum.

Aa3 er fjórða hægsta ratingin av 21 hjá Moody´s. 

Sambært Moody´s er styrkin í føroyska búskapinum búskaparligt sjálvstýri, støðug viðurskifti við Danmark og stórt gjaldføri, sum minkar endurfíggingarváðan.

Útlitini negativ

Men avbjóðingar eru eisini. Almenna skuldin er økt seinastu árini, búskapurin er so nógv tengdur at fiskivinnuni og fíggjarlógin hevur framvegis hall. 

Og júst hetta, at fíggjarlógin hevur havt hall síðani 2008 og skuldarbyrðan veksur, er orsøkin til, at Moody´s metir útlitini hjá Føroyum vera negativ. 

Um Føroyar megna at fáa bygnaðarliga hallið í fíggjarlógini at javnviga og minka skuldina hjá landskassanum, kann tað ávirka ratingina positiva vegin. 

Men klárar landsstýrið ikki at minka hallið í fíggjarlógini, so skuldin veksur meira enn ætlað, kann tað ávirka skoðsmálið skeiva vegin, boðar Moody´s frá.