Assad: Vit hava kemisk vápn

Sýriski forsetin, Bashar al-Assad, viðgongur, at stýrið hevur kemisk vápn, men at hann er til reiðar at beina tey burtur. Tað sigur hann í samrøðu við Fox News.

Forsetin sigur, at tað fer at taka eitt ár og kosta eina milliard dollarar at beina tey burtur.

Álopshóttan onga ávirkan

Assad vísir aftur, at tað er hóttanin frá USA um álop sum ger, at landið nú er sinnað at lata kemisku vápnini av hondum.

USA vil vera við, at sýriska stjórnin brúkti kemisk vápn móti fólkinum í einum álopi í Damaskus fyri einum mánaði síðani. 1400 fólk doyðu. Ein frágreiðing hjá ST staðfesti um dagarnar, at nervagassið sarin varð brúkt í álopinum í Damaskus.