Mugabe kann halda fram sum forseti

Hægsti rættur í afrikanska landinum, Simbabvi, hevur staðfest, at Robert Mugabe er lógliga valdur til landsins forseta. Sostatt er nú klárt at fara undir hátíðarhaldið, sum skal taka 89 ára gamla Mugabe í eið. Hann kann sostatt fara undir sítt fimta valskeið sum forseti

Robert Mugabe megnaði aftur hesa ferð at bera so í bandi, at hann kann halda fram sum forseti.

Ingi Samuelsen

21.08.2013 - 10:44

Ein hægstarættardómari kunngjørdi í gjár, at valini 31. juli vóru fræls, rættvís og álítandi.

Valsvik

Mugabi vann forsetavalið, men politiski mótstøðumaðurin hjá Mugabe, forseta, Morgan Tsvangirai, forsætisráðharri, hevur hildið uppá, at talan var um valsvik.

Eitt yvirlit hjá valnevndini í landinum vísti eftir valið, at fleiri enn 300.000 veljarar ikki fingu høvið at atkvøða, men suðurafrikanski eygleiðarafelagsskapurin, The South African Development Community, sigur, at valið í Simbabvi var fríðarligt og frælst.

Handtaka mótstøðufólk

Fyrr í hesum mánaðinum kom fram, at trygdarløgreglan í landinum hevði givið boð um at handtaka 100 av mótstøðufólkunum hjá Robert Mugabe, skrivar NRK.